GIPASABOT ni Wilson Amad, convenor sa People’s Constitutional Reform Initiative, nga dili usa ka career o propesyon ang pagdumala sa nasud o pagpabaton og gahum sa politika.
Sumala ni Amad, ang pagdagan sa usa ka posisyon sa gobyerno dili parehas sa ubang propesyon nga mahimong ipasunod sa ginikanan ngadto sa ilang mga anak isip legasiya.
Gipasiugda niya nga ang pagserbisyo sa gobyerno nagkinahanglan og “calling” o mas taas nga porma sa pag-alagad, lakip ang pag-antus ug pagbiya sa hayahay nga kinabuhi alang sa kaayuhan sa katawhan.
Gikondena usab ni Amad ang pangatarungan sa pipila nga kung mahimong ipasa sa mga doktor ang ilang propesyon ngadto sa ilang mga anak, mahimo usab kini sa politika.
Matod pa niya, dili angay nga ikompara ang duha tungod kay lahi ang kinaiya ug responsibilidad sa pagserbisyo sa gobyerno. (James Oliver)
