GIPASIUGDA ni ABC Liga ng mga barangay President Marlo Tabac ang risgo sa pagbaha sa ubos nga komunidad tungod sa kusog nga pag-ulan nga nagpadayag sa kakulang sa drainage system sa upland areas sa siyudad.
Sa iyang report atol sa sesyon sa City Council niadtong Lunes , iyang giingong ang tubig gikan sa kabungturan modagayday paubos padulong sa residential areas, ilabi na sa Barangay Puerto ug Agusan.
Tungod niini nanawagan siya sa A Brown Company nga dayon tapuson ang wala mahuman nga drainage project nga nagbutang sa peligro sa mga Purok 3, 4, ug 5 sa Puerto.
Gipangayo usab niya nga mosumite og drainage master plan ang Cebu Landmasters Inc. ug ubang developers aron malikayan ang susamang landslide nga miresulta og upat ka patay sa Zone 2.
Samtang, gi-refer ni Vice Mayor Bebot Rodriguez ang maong kabalaka ngadto sa mga komite sa konseho alang sa dugang imbestigasyon.
