Pwede pa madaug sa depensa ang kaso ni kanhi Presidente Rodrigo Duterte kun ugaling mu‑abante kini sa regular nga hearing sa ICC.
Alang kang Atty. James Judith, daku ang puntos nga iyang ihatag kang Atty. Nicholas Kaufman sa isyu sa “causal link” tali sa mga testimonya sa nagreklamo ug sa direktang pag‑angkon batok kang kanhi Presidente Duterte.
Gibutyag ni Judith, nga posibleng maglisud ang prosekusyon sa pag‑establisar sa lig‑on nga ebidensya, ilabi na nga nasayran sa kampo sa depensa nga adunay immunity ang pipila ka witnesses sa ilang kaugalingong mga kaso, ug kuwestiyonabli ang ilang integridad.
Kini makahatag sa kahigayunan sa depensa nga ipakita nga ang testimonya dili kasaligan ug posibleng naapektuhan sa pulitika.
Iyang gi‑dugang nga sa proseso sa ICC, dili igo nga adunay daghang testimonya; kinahanglan nga mapakita ang pattern of responsibility ug ang klarong koneksyon tali sa mando ni Duterte ug sa nahitabo nga extrajudicial killings.
Kung mapakita sa depensa nga walay lig‑on nga causal link, ug nga ang mga testigo adunay vested interest o political bias, mahimo nga i‑dismiss ang kaso sa yugto pa lang sa Confirmation of Charges o sa trial proper.
