Luwas nga nakabalik na sa Pilipinas ang 442-ka Pilipino gikan sa United Arab Emirates (UAE) pinaagi sa Philippine Government Chartered B747‑400 flight, subay sa direktiba ni Presidente Ferdinand Marcos Jr.
Sakay sa espesyal nga biyahe si Department of Migrant Workers (DMW) Secretary Hans Leo Cacdac uban sa mga repatriates diin kapin sa 200-kanila mao ang mga OFWs.
Ang eroplano milanding sa Ninoy Aquino International Airport (NAIA) Terminal 3, alas‑12 sa udto kagahapon ug gisugat sa DMW kauban ang Overseas Workers Welfare Administration (OWWA), Department of Social Workers and Development (DSWD), Department of Health (DoH), Technical Education and Skills Development Authority (TESDA) ug Bureau of Immigration.
Gisugdan sa gobyerno ang halapad nga repatriation sa mga Pilipino sa Middle East human sa nahitabo nga kagubot.
