Posibleng ideklarar na sa katapusan sa Marso ang opisyal nga pagsugod sa ting-init, sumala sa Philippine Atmospheric Geophysical and Astronomical Services Administration (Pagasa).
Ang hinay-hinay nga pagkaluya sa amihan o northeast monsoon mao ang klarong timaan nga hapit na matapos ang bugnaw nga panahon ug mosulod na ang mainit ug uga nga mga adlaw.
Matod pa sa Pagasa, ang paghinay sa hangin nga amihan nagpasabot nga andam na ang nasud sa mas taas nga temperatura ug mas gamay nga ulan.
Gidugang pa nga sa sunod semana, posible nang ipahibalo ang opisyal nga pagtapos sa amihan ug pagsugod sa dry season.
Gipahimangnoan ang publiko nga mag-andam sa kainit ug kakulang sa tubig, ug magpraktis sa hustong pagtipid aron malikayan ang kadaot nga dala sa umaabot nga panahon.
