Mapasalamaton si Atty. Fel Lester Brillantes ang Chief, Consumer Protection Division sa DTI-10 sa kahigayonan nga mapadayag sa publiko ang mga lakang sa Department of Trade and Industry sa Rehiyon 10. Si Brillantes miingon nga tungod sa tensyon sa Middle East partikular sa Gulf Region, nga naguba ang normal nga suplay sa lana nga naka-apekto sa presyo sa mga batakang palaliton. Gumikan niini, gipakusgan sa ahensya ang price monitoring sa basic necessities ug prime commodities kauban ang ubang ahensya sa gobyerno. Gipunting nila ang mga produkto nga importante alang sa matag panimalay aron masiguro ang kahimtang sa publiko, labi na sa kasamtangang emerhensiya. Tumong niini nga maprotektahan ang mga konsyumer ug malikayan ang dili makatarungang pagsaka sa presyo sa panahon sa krisis.
Dugtong niini, gipasigarbo ni Brillantes, nga bisan pa sa kasamtangang tensyon wala’y kaso nga natala batok sa mga tindahan sa Rehiyon 10 tungod sa paglapas sa Price Act, kay ang DTI nagpadayon sa istriktong pagmonitor sa presyo sa mga batakang produkto sama sa delata, canned fish, milk coffee, laundry soap, ug uban pa, samtang ang Department of Agriculture nagmonitor sa bugas ug uban pang agricultural products, ang Department of Energy pud nagtan-aw sa presyo sa fuel, LPG, ug kerosene. Sa pagkakaron, bastante pa ang supply batakang pagkaon ug panginahanglan sa syudad ug sa tibuok Rehiyon 10, kundiin ang presyo sa mga produkto ginabantayan aron mosunod sa Suggested Retail Price. (co written by Jane Abulag)
