BAYAN Southern Mindanao Nagsubo sa Nagkagrabeng Panghitabo sa Senado ug Kalit nga Kausaban sa Liderato

Gikasubo sa Bagong Alyansang Makabayan (BAYAN)Southern Mindanao ang nagkagrabeng mga panghitabo sa Senado sa miaging mga adlaw, ilabi na sa kausaban sa liderato diin napalagpot si former Senate President Tito Sotto ug gipulihan ni Senate President Alan Peter Cayetano. 

Namahayag si Rauf Sissay sa grupong BAYAN nga adunay pagmaniobra sa grupo nga misangpot sa pag-usab sa liderato sa Senado.

Sumala pa niya, kadudahan nga nisunod dayun  niini ang kalit nga pagpakita pag-usab ni Senador Bato dela Rosa human sa kapin unom ka bulan nga pagkawala sa Senado, ug gihatagan pa kini og protective custody sa bag-ong liderato sa Senado. 

Dugang pa niya, misamot ang tensyon human sa giingong pagsuway ug aresto kang Dela Rosa nga misangpot pa sa insidente sa pagpabuto ug armas sulod sa Senado, hangtod nga miikyas na siya sa building.

Para ni Sissay ang sunod-sunod nga mga hitabo nakahatag og kabalaka ug kasubo sa ilang grupo tungod kay nagpakita kini og giingong pagkunhod sa kahapsay ug kredibilidad sa sistema sa gobyerno ug klarong may kalambigitan sa taliabot nga impeachment trial ni Vice President Sarah Duterte.