Dili malikayan nga mopahayag ug motan-aw ang simbahan sa mga isyu sa politika ug katilingban tungod kay kabahin kini sa ilang moral nga responsibilidad ngadto sa katawhan, sumala ni Rev. Rey Alejandro Lazaro sa United Church of Christ in the Philippines.
Matud sa pastor, sayop ang pagtan-aw sa pipila ka tawo nga nanghilabot lamang ang simbahan sa politika tungod kay ang papel sa simbahan dili lang limitado sa sulod sa simbahan kondili lakip usab ang paggiya sa katilingban sa moral ug hustisya.
Dugang pa sa pastor nga kon adunay mga panghitabo sa katilingban nga nakaapekto sa katawhan, natural lamang nga mopahayag ang simbahan isip kabahin sa ilang panawagan alang sa kamatuoran ug kaayohan sa publiko.
Gipasabot usab ni Lazaro nga dili mahimong magpakahilom ang simbahan sa mga realidad nga nasinati sa katawhan tungod kay ang mga miyembro sa simbahan mao ra usab ang mga ordinaryong tawo nga naapektuhan sa mga isyu sa nasud.
Tungod niini, giingon sa church leader nga ang simbahan nagpabiling moral nga giya sa katilingban ug adunay katungod nga mopahayag sa mga isyung direktang nakaapekto sa kinabuhi sa mga Pilipino.
