Andam na ang mga senador sa pagpaminaw sa tanang ebidensya nga ipresentar alang sa umaabot nga impeachment trial batok kang Vice President Sara Duterte.
Kini ang gipadayag ni Atty. Eddie Cuaresma, kanhi presidente sa IBP Misamis Oriental, human nga gipasa na ang maong kaso ngadto sa labaw nga kapulungan sa lehislatura.
Sukwahi sa miaging tuig, gipasalig sa abogado nga hingpit na ang pagpangandam sa mga senador sa paghukom sa mga pasangil batok sa bise presidente.
Hinuon, nagpabilin nga dakong pangutana kon itugot ba sa mga lagda sa impeachment ang pag-apil ni Senator Bato dela Rosa pinaagi lamang sa video conferencing.
Sa iyang pagtuki, gihatagan og gibug-aton ni Atty. Cuaresma nga gikinahanglan ang pisikal nga presensya sa mga maghuhukom sa session hall, busa hugot ang iyang pagtuo nga dili mahimong tugotan ang maong paagi sa pagtambong.
