Gihimakak sa Spring Company, ang management sa South Korean actor nga si Ji Chang-wook, ang mga report nga gituyo niini ang paglikay sa pagbayad og hustong buhis o “tax evasion”.
Sumala sa maong ahensya, walay nahitabong tinuyong pagtago sa kita human migawas ang mga balita nga gipabayad ang aktor og binilyon ka won human sa gihimong audit sa National Tax Service.
Gipasabot sa kompanya nga aduna lang silay kalainan sa opinyon ug interpretasyon sa tax laws tali sa kagamhanan kon asa ba angay i-kalkula ang kita sa aktor, kon sa iyang kaugalingon ba o sa korporasyon.
Bisan pa niana, giklaro sa Spring Company nga kanunayong tumanon ni Ji Chang-wook ang iyang obligasyon sa buhis sukad pa sa iyang pagsugod niadtong 2008.
Hisayran nga aron masulbad kini, nagplano ang ahensya nga bayran dayon ang penalty tax ug pakusgan pa ang ilang sistema sa accounting aron dili na kini mahitabo pag-usab. (riza budlao)
