Gipangandaman na sa House prosecution panel ang pagpresenta sa ilang mga testigo ug dokumento alang sa pre-trial conference sa impeachment case batok kang Bise Presidente Sara Duterte.
Matod ni Bicol Saro Party-list Representative Terry Ridon, gihan-ay na sa komite ang estratehikong pagkasunod-sunod sa ilang mga ebidensya. Lakip sa mga nag-unang isyu nga tutokan sa panel mao ang giingong anomaliya sa Department of Education (DepEd), paggasto sa Office of the Vice President (OVP), ug ang kwestyonableng paggamit sa confidential funds.
Gisiguro sa Ubos-Kamara nga lig-on ug dunay saktong basehan ang maong mga pasangil aron mapanubag sa Senado ang ikaduhang labing taas nga opisyal sa nasod.
Gilauman nga mas mosamot pa ang tensyon sa politika sa Pilipinas sa higayon nga pormal nang mosugod ang maong panaghusay.
