Gikondinar ni Atty Ferdinand Topacio, usa sa mga abogado sa kanhi 18 marines ang pagharang kanila sa pagsulod sa “events place” sa Mandaluyong City, kaganina sa buntag.
Sa pakighinabi sa BOMBO RADYO, gikastigo sa abogado ang kasamtangang administrasyon sa pag-ipit sa ilang mga lakang nga masayran sa publiko ang kamatuoran kalabot sa pagbahin-bahin sa flood control funds sa mga kanhi ug aktibong opisyales sa gobyerno.
Nagtoo si Topacio nga ang pagpadlak sa lugar kung asa ipahigayon ang Blue Ribbon Committee ni Senador Pia Cayetano, tataw nga adunay gamhanan nga tawo nga nagbabag nga masayran sa katawhan Pilipino ang kamatuoran luyo sa mga personal nga nakasaksi ug testigo sa pagbahin-bahin sa maleta ni kanhi Kongresista Zaldy Co.
Hisayran nga magsugod unta sa alas 10 ang sumpay sa hearing ni Senador Rodante Marcoleta sa Senate BRC-Sub Committe sa alas 10 sa buntag, apan wala sila pasudla sa events place ug gipalibutan pa nagpader nga ihap sa mga pulis.
