Gipahayag ni Presidente Ferdinand Marcos Jr. nga andam ug abli ang Pilipinas sa posibilidad nga makabaton og Visiting Forces Agreement (VFA) uban sa nasod sa Germany. Matod sa Pangulo, bisan pa man nga layo pa kini nga mahan-ay, padayon karon nga nagalapad ang kooperasyon sa duha ka nasod sa natad sa militar, depensa, ug seguridad.
Gipasabot usab niya nga taliwala sa mga krisis ug kakulian sa geopolitics sa kalibutan, dako og tabang ang pagporma og mga alyansa aron mapadayon ang relasyon ug kalinaw.
Dugang pa ni Marcos, gipaabot usab sa nasod ang hingpit nga katumanan sa mga kasabutan sa kalinaw sa laing dapit aron masulbad ang krisis sa lana nga nakaapekto sa ekonomiya sa tibuok kalibutan.
Gihatagan niya og gibug-aton nga ang pagtinabangay sa daghang nasod o ‘multilateralism’ mahinungdanon kaayo tungod kay konektado ang dagan sa ekonomiya ug seguridad sa tanan.
