Gisugdan na sa Department of Social Welfare and Development (DSWD) ang Emergency Cash Transfer (ECT) program alang sa mga pamilya nga naapektuhan sa magnitude 7.8 nga linog nga miigo sa bahin sa Sarangani ug kasikbit nga mga lugar niadtong Hunyo 8.
Gibutyag sa DSWD, magsugod ang pag-apod-apod sa cash assistance karong Martes, Hunyo 23, sa mga apektadong lugar sa Davao Occidental, Sarangani, ug General Santos City.
Makadawat sa tabang ang mga pamilya gikan sa Glan ug Malapatan sa Sarangani, General Santos City, ug sa mga lungsod sa Balut Island ug Jose Abad Santos sa Davao Occidental.
Ang programa kabahin sa early recovery program sa ahensya nga nagtinguha nga matabangan ang mga pamilya nga makabangon, makapaayo sa ilang naguba nga balay, ug makapalit sa mga nag-unang panginahanglan.
Giingon sa DSWD nga napanghatag na ang mga food packs ug non-food items sa unang mga adlaw sa kalamidad, busa cash assistance na ang sunod nga lakang alang sa recovery phase.
Base sa data sa ahensya, kapin sa 84,000 ka balay ang natala nga partially ug totally damaged tungod sa linog.
Anaa sa kapin sa 139,000 ka pamilya gikan sa Regions 11 ug 12 ang makadawat sa tabang, nga adunay kabuuang pondo nga molapas sa ₱799 milyon.
