Luwas ug walay nasamdan sa komunidad sa mga Pilipino sa Venezuela human sa pag-igo sa 7.2 ug 7.5 magniyude nga linog sa Venezuela, kagahapon.
Sa exclusive interview sa BOMBO RADYO CDO kang Atty. Jan Mikhail Solitario, ang 3rd Secretary ug Vice Consul sa Embahada sa Pilipinas sa Bogota, siya miingon nga padayon ang ilang monitoring sa hitabo ilabe na nga anaa lamang sa 74 ka pinoy ang namuyo sa maong lugar.
Ang ilang monitoring gihimo pinaagi sa gitukod nga online coordination group.
Dugtong niini, bisan pa man nga walay pisikal nga opisina o direktang presensya ang embahada sa Pilipinas sa Venezuela, nagpadayon gihapon ang ilang pagpangumusta kanila.
Dugang pa ni Solitario nga kanunay sila makadawat sa mga report ug update gikan mismo sa mga Pilipinong nagpuyo didto, ug sila mismo ang nagpamatuod nga anaa sila sa luwas nga kahimtang.
