Misaka pa ngadto sa 500 ang patay sa ebola outbreak sa Democratic Republic of the Congo sumala kini sa World Health Organization (WHO).
Giingong padayon pa nga nagkadako ang maong outbreak gumikan sa kanunay nga paglihok sa populasyon diin nakapadasig sa pagkaylap sa maong sakit.
Gikumpirma usab sa kagamhanan nga miabot na sa 1,561 ka kaso ang natala, kon asa 506 na ka pasyente ang namatay sa maong talagsaong matang sa kagaw nga wala pa’y opisyal nga tambal.
Matod pa nga usa sa dakong hagit mao ang pagkapuno sa mga treatment center ug ang pipila ka mga pasyente nga wala nagpatambal sa ilang dapit, hinungdan nga nadala nila ang sakit ngadto sa ubang rehiyon.
Hisayran nga padayon ang paningkamot sa mga otoridad nga magbutang og dugang checkpoints sa mga dalan aron mapugngan pa ang pagkaylap sa maong makamatay nga virus.
