Kinahanglan nga i-reform o usbon ang paagi sa pagpadagan sa impeachment trial batok kang Bise Presidente Sara Duterte aron mahatagan og prayoridad ang hustisya inay ang mga teknikalidad, matud pa sa Constitutional expert nga si Atty. Tony La Viña.
Sa iyang interbyu sa Bombo Radyo, gipasabot sa abogado nga nga ang katuyoan sa Konstitusyon sa maong proseso usa ka People’s Tribunal diin ang mga piniling politiko ang angayng mopatingog sa tingog sa katawhan.
Dugang pa sa eksperto, angayan nga itakilid una ang bisan unsang mga teknikal nga mga lagda nga makababag sa pagpadayag sa kamatuoran aron masiguro ang husto nga proseso o due process.
Sa katapusan, giklaro ni Atty. La Viña nga angay hatagan og higayon ang tanang partido sa pagpresentar sa ilang mga ebidensya ug tubag aron dili magpabilin nga huot ug limitado ang dagan sa maong husay.
