Lahi ang pagtan-aw ni Atty. Constantino Tinnex Jaraula, kanhi mayor sa Cagayan de Oro ug kongresista, sa mga bahad ni bise presidente Sara Duterte kon itandi kini sa mga kilos protesta sa mga militanteng grupo.
Gipamatud-an sa abogado nga bisan pa og gitugot sa demokrasya ang pagpadayag sa sentimento, dili na matawag nga freedom of speech ang paghulga sa kinabuhi o pagplano og pagpatay sa isigkatawo.
Dugang pa ni Atty. Jaraula, adunay limitasyon ang pag-express sa emosyon ilabi na kon ang naghimo niini usa ka taas nga opisyal sa kagamhanan nga gilauman nga magpakita og pagtahod sa balaod.
Tungod niini, klaro alang sa maong abogado nga dili angay itandi ang duha ka senaryo tungod kay dako ang kalainan sa pagpadayag sa mulo sa masa ug sa seryosong pagbahad sa usa ka opisyal.
