Gipasidan-an ni Propesor Christopher Ryan Maboloc gikan sa Ateneo de Davao ang kadelikado sa paghimo og bisan unsang lakang nga makapukaw og gubat tali sa Pilipinas ug China sa West Philippine Sea.
Giklaro ni Maboloc nga bisan pa og duna kitay alyansa sa Estados Unidos, dili kini garantiya nga malikayan ang kadaot tungod kay ang atong nasud ra gihapon ang mag-antos sa katapusan kon adunay mahitabo nga kagubot sama sa kaso sa Ukraine.
Hinuon, nagtuo ang propesor nga ang labing maayong pamaagi mao ang pagpadayon sa diplomatikong pakigsabot sa ubang mga nasud sa ASEAN aron maseguro ang kalinaw sa rehiyon.
Tungod niini, gipamugos niya nga mas prayoridad unta ang pag-istorya kaysa magsalig sa pwersa nga mahimong magdala sa nasud sa hilabihang kapildihan.
