Gipasalig sa Medical Officer sa DepEd Cagayan de Oro nga si Doc. Mark Miso nga luwas ang gipahigayong deworming sa mga pampublikong tulunghaan human sa taho sa insidente didto sa Cavite.
Bisan pa man sa maong kabalaka, gipamahayag sa doktor nga base sa iyang 12 ngadto sa 14 ka tuig nga kasinatian, wala pa gayuy estudyante sa syudad ang na-ospital tungod sa maong tambal.
Subay niini, gipatin-aw ni Doc. Miso nga padayon ang ilang paghatag og deworming tablets ngadto sa mga tinun-an gikan Grade 7 hangtod Grade 12 apan hugot nilang gipatuman ang pagkuha og consent gikan sa mga ginikanan o guardian.
Samtang naghulat pa sa dugang instruksyon gikan sa Department of Health, giawhag sa opisyal ang padayong koordinasyon tali sa mga tulunghaan, lokal nga kagamhanan, ug City Health Office aron masiguro ang kaluwasan sa mga bata.
