Gisagop sa Police Regional Office 10 ang estratehiya nga “Borderless Policing” aron masiguro ang hapsay ug paspas nga aksyon sa kapulisan batok sa mga krimen, ilabina sa pagtubag sa mga nahitabong hulga sama sa bag-ohay pa lamang nga pagpamomba og granada sa Shariff Aguak, Maguindanao del Sur nga nakaangol sa duha ka sundalo ug tulo ka sibilyan.
Gipasabot ni PBGEN Christian N. Abrahano pinaagi sa usa ka pressconference nga gipalig-on nila ang ilang sistema pinaagi sa pag-focus sa tulo ka elemento nga mao ang pagpangandam, pagpugong, ug ang epektibong pagtubag sa emerhensya.
Gidugang pa niya nga pinaagi sa maong pamaagi, ang mga estasyon sa kapulisan sa nagkalain-laing probinsya dili na magpanagana sa pagtinabangay bisan pa man kung molapas na sa ilang hurisdiksyon ang imbestigasyon.
Tungod niini, gipasalig sa maong opisyal nga mas mapaspasan pa ang pagpanalipod sa katawhan batok sa bisan unsang hulga o kriminalidad sa nagkalain-laing rehiyon.
