Nag-iyahay na lang og palit ug padeliber og tubig ang mga mamaligyaay sa Bulua Fish Landing aron masulbad ang problema sa suplay nga nakaapekto sa kahinlo sa merkado, matod pa ni Cagayan de Oro Seafoods Wholesalers Association President Irene Floro.
Gani, giangkon niya nga gumikan sa limitasyon sa rasyon sa Cagayan de Oro Water District, ang ilang mga miyembro gikan sa Bay 1 hangtod sa Bay 16 ang nagkugi sa paggasto alang sa ilang inadlaw-adlaw nga panginahanglan sa tubig.
Tungod niini, nanawagan si Floro sa lokal nga gobyerno ug sa maong water district nga sutaon ug hatagan og saktong solusyon ang direktang linya sa tubig sa pasilidad.
Samtang padayon ang ilang pagpanglimpyo sa maong dapit, gilauman sa grupo nga mahatagan na og igong pagtagad kining ilang mulo aron malikayan ang reklamo sa publiko bahin sa kabaho.
