Gisupak sa pipila ka transport groups ang gipasigarbo nga transisyon sa degasolina padulong sa electronic vehicles sa dagan sa transportasyon sa Pilipinas.
Sa exclusive interview sa BOMBO RADYO, miingon si Lalaine Escobidal, Presidente sa PN Roa Canitoan Transport (PONTRANSCO) bug-at ang mga rason kon ngano nga nagduha-duha gihapon ang pipila ka transport group sa pagbalhin ngadto sa electric vehicles (EVs).
Iyang gipamugos nga bisan pa man nga maayo ang EVs alang sa pagsulbad sa climate change, dako gihapon ang hagit bahin sa kakulang sa mga charging station sa nasud.
Gawas niini, mi-angal usab silang mga operators sa pwerteng mahala sa presyo sa mga baterya nga naghatag sa dugang kalisod sa mga kooperatiba.
Una niini, gipasigarbo ni Presidente Ferdinand Marcos Jr ang paggamut sa hybrid ug electric vehicle (EV) kay wala na kaayo mabati ang bug-at nga epekto sa pagsaka sa presyo sa petrolyo sa nasud.
Sa iyang ikalima nga State of the Nation Address (SONA) iyang gidasig ang mga transport groups nga mas mupili sa mga sakyanan nga makatabang sa limpyong enerhiya ug likayan sa hinay hinay ang pagdepende sa tradisyonal nga degasolina nga mga sakyanan.
Gani, gipaningkamutan sa iyang administrasyon nga ipaubos ang presyo niini sa merkado aron makapalit ang katawhang Pilipino pinaagi sa giwagtang nga tanang buhis o taripa sa mga e-vehicles hangtod sa tuig 2028.
