Gisaway pag-ayo ni kanhi PHIVIDEC Administrator Pompee La Viña si Presidente Ferdinand Marcos Jr. ug gihulagway nga murag “naa sa laing planeta” ang pangulo atol sa iyang giluwatang State of the Nation Address (SONA).
Iyang gipahayag nga nakalimtan ug wala gayod nasampit sa presidente ang tinuod nga kahimtang sa nasud diin usa sa matag upat ka Pilipino ang nag-atubang karon sa involuntary hunger o tinuod nga kagutom.
Gibatikos usab ni La Viña ang kakulang sa klarong plano ug pamaagi gikan sa gobyerno kon unsaon pagatubang ug paghatag og solusyon sa maong krisis sa pagkaon.
Nadismaya usab siya sa mga sakop sa Kongreso, lakip na ang mga representante gikan sa Cagayan de Oro, nga sige rag palakpak samtang wala man lang gitagad ang lisud nga kahimtang sa katawhan.
Alang kaniya, usik ug walay kapuslanan ang labaw sa usa ka oras nga diskurso sa Pangulo tungod kay napakyas kini sa paghatag sa paglaum sa mga nag-antus sa kagutom.
Giawhag ni La Viña ang administrasyon nga tutokan ang mga pangunang pangangailangan sa publiko kaysa sa mga pasikat nga mga proyekto.
