Taliwala sa nagkataas nga tensiyon ug sunod-sunod nga mga pag-atake sa Israeli settlers, gipadayag sa mga Palestinian nga residente sa occupied West Bank nga hapit na maabot sa gitawag nilang “breaking point” ang ilang sitwasyon.
Nahitabo kini human sa dugoon nga panagsangka sa baryo sa Tal, Southwest sa Nablus, nga gikinamatay sa 6 ka tawo, lakip ang upat ka Palestinian ug duha ka Israeli.
Sumala sa Israeli military, nagsugod ang insidente human giingong giatake sa mga armadong Palestinian ang usa ka grupo sa mga Israeli settlers, nga misangpot sa armadong panagsangka.
Human sa insidente, hugot nga gihingusgan sa militar sa Israel ang ilang mga operasyon, checkpoints, ug road closures sa palibot sa Nablus aron mapugngan ang dugang pang kagubot ug mapalig-on ang seguridad sa maong lugar.
Matod sa mga residente, ang maong insidente dili na lamang usa ka talagsaong hitabo, kondili timaan sa nagkalalom nga krisis tali sa mga Palestinian ug mga Israeli settlers sa occupied West Bank.
Samtang, padayon nga nanawagan ang internasyonal nga komunidad og hinanaling aksyon aron mapugngan ang paglala sa kapintasan ug malikayan ang mas lapad pang panagbangi sa rehiyon. (jane abulag)
