Naghatag sa komento si Senador Erwin Tulfo kalabot sa pahayag ni Pangulong Ferdinand “Bongbong” Marcos Jr. bahin sa posibleng pagsaka og kaso batok kang kanhi House Speaker Martin Romualdez.
Matod ni Tulfo, ang pag-ingon sa Pangulo nga dili siya presidente sa iyang pamilya ug mga higala kundili sa tibuok Pilipinas nagpasabot nga wala kini magpugong sa pag-aksyon batok sa bisan kinsang mahimong manubag.
Sumala sa senador, apil niini ang mga opisyal o indibidwal nga mahimong maapil sa imbestigasyon sa mga alegasyon sa kahi-wi-an, bisan pa og adunay personal nga koneksyon sa Pangulo.
Ang maong isyu may kalabotan sa mga alegasyon sa anomalya sa mga proyekto sa flood control nga gisusi sa mga awtoridad.
Gisulti usab ni Tulfo nga misalig siya sa Ombudsman sa pagdumala sa proseso ug sa pagpangita sa kamatuoran batok sa mga responsable kung mapamatud-ang adunay nahimong kalapasan. (jane abulag)
