Gigamit na sa katawhan ang gahum sa Konstitusyon pinaagi sa People’s Initiative aron tapuson ang dugay na nga pagpaka-bungol sa gobyerno sa balaod batok sa political dynasty.
Gipahayag ni Xavier University – Ateneo de Cagayan SIAP Director Nestor Mesias Banuag Jr. nga dili na angay magpakahilom ang publiko samtang nagpabilin nga pending ang maong balaodnon sa Kongreso sulod sa halos 40 ka tuig. Pinaagi sa Dapat Isa Lang Initiative, iduso sa mga lungsuranon ang pagdili sa political dynasty hangtod sa ikaupat nga grado.
Kini itandi sa ginaduso sa lehislatura nga kutob ra sa ikaduhang grado. Ang kalihukan nagtinguha nga mapalig-on ang demokrasya ug mapugngan ang monopolyo sa gahum sa pipila ka pamilya sa politika.
