Gipasalig sa administrasyon ni Pangulong Ferdinand Marcos Jr. nga mas pahugtan pa ang mga lagda sa paggasto sa pondo sa gobyerno aron malikayan ang pag-usik ug pag-abuso niini.
Sumala ni Presidential Communications Office Undersecretary Clarissa “Claire” Castro, gimandoan sa Presidente ang Department of Budget and Management o DBM, ubos sa pagpanguna ni Secretary Amenah Pangandaman, nga magpatuman og mas hugot nga mga patakaran sa paggamit sa pondo sa katawhan.
Tumong niini nga masiguro nga ang badyet mapadulong sa mga lehitimong programa ug proyekto nga makahatag og kaayohan sa mga Pilipino.
Gipasiugda sa DBM nga ang mga tigom alang sa pagplano ug pagpaayo sa serbisyo publiko kinahanglan adunay klarong katuyoan, ug ang matag gasto kinahanglang gikinahanglan ug makatarunganon.
Dugang pa, dili ang kantidad sa badyet nga nagasto ang pangunang sukdanan sa performance sa usa ka ahensya, kondili ang konkretong resulta ug serbisyo nga nahatag niini sa katawhan. (jane abulag)
