Nagpadayon ang imbestigasyon sa Kingdom of Saudi Arabia sa kapakyasan sa ilang air-defense systems nga wala makapugong sa pag-atake sa King Khalid International Airport sa Riyadh.
Sa pinakabag-ong report, mokabat na sa 14 ang namatay ug mga 320 ang naangol sa sunod-sunod nga pag-atake sa airport sa hinapos sa semana.
Subay sa report, unang migamit sa mga drone ang mga rebeldeng Houthi sa Yemen sa wala pa gilunsad ang mga cruise ug ballistic missile padulong sa airport, nga kapin sa 1,000 kilometros ang gilay-on gikan sa Yemen.
Niadtong Oktubre 12, mipahayag ang mga Houthi nga gilunsad na usab nila ang pag-atake sa airport ug usa ka air base sa Khamis Mushait, apan gipugngan sa Saudi-led coalition ang usa ka ballistic missile nga gipunting sa Riyadh.
Tungod sa nagpadayong hulga, gipalugway sa mga awtoridad ang pagsuspenso sa operasyon sa airport hangtod Oktubre 17 samtang gisusi ang seguridad sa mga pasilidad.
