Gipahibalo ni Ryan Blanco, hepe sa Disaster Risk Reduction and Management (DRRM) sa DepEd Cagayan de Oro, nga nag-andam na ang ilang buhatan og mga protocol alang sa posibleng emerhensiya sa mga eskwelahan.
Matod ni Blanco, duha ka bulan na ang milabay sukad ilang gipresentar sa management committee ang mga lakang sa pagpangandam, diin mitambong ang mga school head ug principal.
Lakip sa ilang pagpangandam ang koordinasyon sa medical team ug pag-andam sa tubig ug uban pang panginahanglan sa mga estudyante panahon sa emerhensiya.
Nakigtambayayong usab ang DepEd Cagayan de Oro sa Disaster Risk Reduction and Management Office (DRRMO), ubos sa pagpangulo ni Nick Jabagat, aron hisgotan ang mga lakang sa pagsuspenso sa face-to-face classes depende sa sitwasyon sa matag eskwelahan o lugar.
Gitumong niini nga maandam ang mga eskwelahan sa pag-atubang sa mga emerhensiya ug masiguro ang kaluwasan sa mga estudyante ug Mamumuo.
