Nanawagan si Senate President Sherwin Gatchalian ngadto sa mga lokal nga kagamhanan ug law enforcement agencies nga palig-onon ang mga lakang sa seguridad aron masiguro ang kaluwasan sa mga biyahero karong taas nga weekend alang sa paghinumdom sa kalag-kalag.
Matud ni Gatchalian, gilaumang modagsa ang mga pasahero sa mga expressway, nag-unang kadalanan, bus terminal, tugpahanan, ug pantalan samtang gapanguli ang mga Pilipino aron duawon ug hinumdoman ang ilang mga mipanaw na nga minahal sa kinabuhi.
Tungod niini, giaghat sa Senador ang lokal nga kagamhanan ug mga otoridad nga pakusgan ang pagpatuman sa security protocol aron malikayan ang mga insidente ug masiguro nga maayo ang pagbiyahe sa publiko.
Mipahayag ang senador nga mahimong mas makahulogan ang paghinumdom sa mga handuman sa mga mipanaw na nga mahal sa kinabuhi kung mayo ug luwas ang tanan sa pagbiyahe.
Gihatagan usab og gibug-aton ni Gatchalian ang kamahinungdanon sa disiplina, pasensya, ug pagtahud sa kaubang motorista, ilabi na sa panahong gilauman ang mas grabe ang dagan sa trapiko.
Dugtong niini, gitambagan usab sa Senador ang mga motorista nga mobiyahe karong kalag-kalag nga dili ipatigbabaw ang kainit sa ulo ug mahimong matinahuron sa mga kaubang motorista. (raniel mahunyag)
