Gisaka sa Philippine Institute of Volcanology and Seismology (PHIVOLCS) sa Department of Science and Technology (DOST) ang alert staus sa Bulkang Mayon gikan sa Alert Level 2 ngadto sa Alert level 3, karong alas 12:30 sa udto, Oktubre 30, human niini makabaton og moderate explosive eruption sa alas 11:53 sa kabuntagon.
Ang pagtaas ngadto sa Alert level kay nagpasabot sa bag-ong lebel sa magmatic eruption, nga nagpakita sa hulga sa delikado nga lava flows ug pyroclastic density currents (PDCs) sa ubos ug tunga-tungang bahin sa bulkan.
Nagbuga ang maong bulkan og baga nga ash plume nga miabot sa 3,000 metros ang katas-on gikan sa summit crater samtang gitulak kini sa hangin padulong sa west-southwest.
Isip isa sa pinakaaktibong bulkan sa Pilipinas, ang Bulkang Mayon kay adunay kasaysayan sa makadaot nga pagbuto, lakip na niini ang insidente diin ang PDCs ug lava flows kay miabot sa mga komunidad.
Tungod niini, hingpit nga girekomenda ang pagbakwit gikan sa sulod sa 6-kilometer radius Permanent Danger Zone (PDZ) ug ingon man usab ang pagdili sa civil aviation nga molupad duol sa summit sa maong bulkan.
Gilaumang makasinati og ashfall ang mga komunidad sa Daraga, Camalig, Guinobatan, ug uban pa duol nga munisipalidad sa probinsya sa Albay.
Padayon gihapon ang hugot nga pagbantay sa kawanihan samtang gipahimangnoan ang publiko batok sa posibleng hulga sa lahar ug sediment-laden streamflows sa mga suba nga duol sa maong bulkan, ilabi na sa panahon nga kusog nga pag-ulan. (raniel mahunyag)
