Natangtang na sa kompetisyon sa Pan Pacific Open si Filipina tennis star Alex Eala human mapildi kang Diana Shnaider sa quarterfinals, sa iskor nga 2-6, 7-6(5), 6-4, karong adlawa sa Ariake Coliseum sa Tokyo, Japan.
Gidominar ni Eala ang unang set human makadaog sa lima ka sunod-sunod nga duwa, apan nakabawi si Shnaider sa ikaduhang set ug nakadaog sa tiebreak, 7-5, human nakahimo og double fault si Eala.
Sa ikatulong set, mihangyo si Eala og medical timeout sa ikaunom nga duwa tungod sa problema sa iyang wala nga tiil, apan mipadayon gihapon siya sa pagdula hangtod nasiguro ni Shnaider ang kadaugan pinaagi sa pagserbisyo sa kataposang duwa.
Kini ang ikaduhang sunod-sunod nga kapildihan ni Eala batok kang Shnaider human usab siyang gipildi niini sa Ningbo Open sa iskor nga 7-5, 6-4 niadtong miaging semana, samtang gikatakdang moapil ang Filipina sa WTA 250 Hong Kong Open sa sunod semana, bisan pa nga wala pa matino kung makadula siya tungod sa problema sa iyang tiil. (raniel mahunyag)
