Nagpasidaan ang Koronadal City Health Office (CHO) ngadto sa publiko batok sa pagkaon sa mga pagkaon nga gihalad ug gibiyaan sa mga lubngangan sa mga sementeryo karong kalag-kalag tungod sa dakong peligro niini sa panglawas.
Sa pakighinabi sa Bombo radyo Koronadal kang Koronadal City Health Officer Dr. Vincent Ende, gipatin-aw niini nga dili luwas nga kan-on ang maong mga halad tungod kay na-expose na ang pagkaon sa hangin, abog, mga insekto, ug uban pang mga mikrobyo sa palibot.
Matud ni Dr. Ende, ang mga pagkaon nga dugay nang nabiyaan sa gawas nga walay tabon kay dali ra nga makontamina nga mamahimong magresulta sa pagsakit sa tiyan, pagsuka, pagkalibanga, ug food poisoning sa mga mokaon niini.
Tungod niini, hugot nga gidili ang pagkaon sa mga halad sa mga lubngangan ug gitambagan ang mga mobisita nga magdala og ilang kaugalingon pagkaon nga giandam sa limpyo ug luwas nga paagi. (raniel mahunyag)
