Gihangyo sa Archdiocese of Cagayan de Oro ang mga ginikanan ug publiko nga undangon na ang pag-organisar og mga Halloween party nga nag-awhag sa pagsuot og mga makalilisang nga maskara ug kostume sa demonyo.
Gibutyag ni Archdiocesan Exorcist Fr. Jun Balsamo Jr. nga ang pagpasuot sa mga bata og bisti sa dautang espiritu nagbilin og negatibong epekto sa ilang subconscious level nga pwedeng mag-abli sa pultahan sa pagsulod sa yawa sa ilang kinabuhi.
Gipasabot sa pari nga dili demonyo ang mga mipanaw nga minahal sa kinabuhi, busa mas angayan nga ipahigayon ang “Parade of Saints” imbes nga magsaba-saba ug mag-party sulod ug gawas sa sam-ang.
Gi-awhag sa simbahan ang katawhan nga ibalik ang solemnidad sa Kalag-Kalag pinaagi sa pagsimba ug pag-ampo alang sa mga kalag sa purgatorio.
