Gipakatap sa Aviation Security Group ang dugang mga kapolisan sulod ug gawas sa Laguindingan Airport taliwala sa nagpadayon nga full alert status alang sa Kalag-Kalag.
Gipahayag ni PLTCOL Mardy Hortillosa II nga nagpadala og dugang pwersa ang ilang regional office aron sigurohon ang hapsay ug luwas nga biyahe sa matag pasahero.
Subay sa mando sa ilang headquarters, magpabilin ang full alert sugod pa kaniadtong Oktubre 27 hangtod na sa Nobyembre 3 alang sa seguridad sa mga night ug early morning flights.
Busa, gi-awhag sa pulisya ang publiko nga magsayo pag-abot sa terminal ug tumanon ang mga patakaran aron dili malangan sa ilang biyahe.
