Gi-awhag ni Bacoor City Mayor Strike Revilla ang mga pet owners nga nakasinati sa problema batok sa Ahjay Paws Aftercare Pet Crematorium nga makigtambayayong sa kapolisan aron mapalig-on ang kasong ikasaka batok sa mga responsable sa kontrobersiya.
Gipasira na sa lokal nga kagamhanan sa Bacoor ang maong pasilidad human madiskubre ang mga patay nga iro ug iring nga gilabay sa San Jose del Monte, Bulacan ug nalambigit sa nagpadayong imbestigasyon.
Gisusi usab sa mga otoridad ang kakulang sa dokumentasyon sa krematoryo human mapakyas ang tag-iya sa pagpakita og igo nga ebidensiya nga ang mga binuhi nga gisalig kanila tinuod nga na-cremate.
Gidasig ni Revilla ang kapin 47 ka mga reklamante nga mopasaka og pormal nga mga reklamo, lakip ang posible nga estafa cases, aron masiguro ang hustisya alang sa mga naapektuhang tag-iya sa binuhi.
Gipasalig sa mayor nga ipadayon sa siyudad ang pagpangita og accountability sa mga nalambigit samtang giandam usab ang mas hugot nga regulasyon alang sa pet crematoriums ug pet aftercare services sa Bacoor.
