Gidali-dali na sa kagamhanang lokal sa Cagayan de Oro ang mga lakang ug pagpangandam alang sa 5 hangtod 6 ka bulan nga hagit sa Super El Niño nga moluntad hangtod sa unang kwarter sa tuig 2027.
Gipahibalo ni City Information Officer Jade Adeser nga nagpatawag gilayon og tigum si Mayor Rolando “Klarex” Uy sa tanang kapunoan sa City Hall aron sigurohon ang mga plano ug gimandoan ang tanan nga mangandam sa grabeng kainit.
Gipasabot sa opisyal nga apil sa mga preparasyon ang pag-download sa 5-percent disaster risk reduction fund sa mga barangay, pagpahigayon og water rationing, ug pag-andam og financial aid alang sa mga apektadong mag-uuma.
Tungod sa maong sitwasyon, gipasalig sa kagamhanan nga gihimo sa LGU ang tanang gahum aron mapakunhod ang epekto sa krisis sa matag pamilyang Kagay-anon.
