Gipasalig sa Philippine National Police nga dili makaapekto ang ilang personal nga relasyon o ang kaniadtong posisyon ni Senador Ronald Bato dela Rosa isip hepe sa nasudnong kapulisan sa ilang pagpatuman sa warrant of arrest batok kaniya.
Sunod kini sa paghagit sa Malacañang sa PNP nga sigurohong walay mahimong impluwensya ang kaniadtong posisyon ni Dela Rosa sa operasyon sa pagpangita ug pagsikop niini.
Matud sa hepe sa Public Information Ofice sa Philippine National Police (PNP) nga si Pcol. Allen Rae Co, tumanon nila nga matinud-anon ang ilang katungdanan sa pagpatuman sa warrant of arrest batok sa gatago-tagong senador ug dili tugotan ang bisan unsang sagabal nga mobabag niini.
Gipanghingusgan ni Co nga ang ilang desisyon kay hugot nga nakabasi sa balaod ug sa ilang gipanumpaan, inay nga sa personal nga pagpili ug political discretion lamang. (raniel mahunyag)
