Kusganong gisupak ni Ombudsman Jesus Crispin ‘Boying’ Remulla ang pagbaton og ‘personal assistant’ ni kanhi House Speaker Martin Romualdez sa sulod sa prisohan.
Matud ni Remulla, gidili ang ingon niining matang sa ‘set up’ sa prisohan ug nagpasidaan kini nga dili kini mahimo kon ugaling tinuod ang maong hugon-hugon.
Gisusi pa sa Ombudsman ang maong impormasyon nga nag-ingon nga dunay ‘personal assistant’ si Romualdez sa iyang detensyon.
Mahinumdoman nga una nang giangkon ni New Quezon City Jail Male Dormitory Warden Supt. Maria Lourdes Pacion ngadto sa Sandiganbayan ang bahin sa matud pa personal assistant ni Romualdez.
Nagpasidaan si Remulla nga dili siya magduha-duha sa pagtaktak sa bisan kinsa sa serbisyo kung mapamatud-an ang tulubagon sa mga opisyal nga nalambigit.
Miangkon si Remulla nga karon lamang niya nadungog ang bahin sa pagbaton og personal assistant sulod sa prisohan ug aron personal nga masusi kung duna bay iregularidad sa mga prisohan, gipahibalo niini ang planong pagpahigayon og ‘surprise visit’ sa maong mga pasilidad.
Mipahayag usab si Remulla nga ang pokus sa ipahigayong pag-inspeksyon kay makita kung dunay ‘special treatment’ sa sulod sa mga prisohan ug aron papanubagon ang mga nalambigit ug nakigkunsabo nga mga opisyal. (raniel mahunyag)
.jpg "Malacañang, nagpahigayon sa mga programa sa pagpalambo sa kahanas ug pagpalapad sa oportunidad sa trabaho")
