Giawhag sa Department of Energy (DOE) ang mga motorista nga ireport ang mga kompanya sa lana ug mga gasolinahan nga wala mosunod sa gimando nga pagpaubos sa presyo sa petrolyo, tungod kay mamahimo silang paatubangon og mga silot ubos sa kasamtangang mga balaod ug regulasyon.
Gipahibalo ni DOE Oil Industry Management Bureau Director Rino Abad nga nagpahigayon na ang ahensya og mga inspeksiyon sa mga gasolinahan aron masiguro ang pagsunod sa gimando nga pag-usab sa presyo, ug mahimong mag-isyu og show-cause order ngadto sa mga kompanyang dili makahatag og makataronganong katin-awan sa ilang wala pagsunod.
Gidasig usab ang publiko nga ireport ang mga posibleng paglapas pinaagi sa 8888 hotline o sa bahin nga “Gas Station Concerns” sa eGovPH application.
Sumala sa DOE, ang dakong pag-ubos sa presyo sa petrolyo kay nag-ugat sa paglaom nga makab-ot ang diplomatikong kasulbaran sa panagbangi tali sa Estados Unidos ug Iran, nga nakapahuyang sa kabalaka bahin sa posibleng pagkabalda sa suplay sa lana sa Middle East, samtang gipasalig usab sa ahensya nga igo ang reserba sa petrolyo sa nasud aron matubag ang panginahanglan. (raniel mahunyag)
