Malampusong nakabalik sa Kalibutan ang Starship spacecraft sa SpaceX human sa 22.5-ka-oras nga misyon sa kawanangan, diin sa unang higayon, nasakmit kini sa dagkong mekanikal nga mga bukton sa launch tower sa kompanya sa Starbase, Texas, Estados Unidos, niadtong Sabado, Nobyembre 14.
Atol sa ika-15 nga test flight niini, nakakompleto ang upper stage sa Starship og 14 ka tuyok palibot sa Kalibutan ug malampusong gipagawas ang 26 ka Starlink satellites ngadto sa orbit sa wala pa kini misugod sa pagsulod pag-usab sa atmospera sa Kalibutan.
Bisan pa sa malampusong pagbawi sa upper stage, napakyas ang Super Heavy booster sa pagbalik sa launch pad tungod sa problema sa sistema sa paggiya niini, nga maoy hinungdan sa pagkansela sa giplanong pagsakmit niini ug sa pagkapukan niini ngadto sa Gulpo sa Mexico.
Giisip ang malampusong pagsakmit sa Starship isip dakong kalampusan sa inhenyeriya ug mahinungdanong lakang sa paningkamot sa SpaceX nga makahimo og rocket system nga hingpit nga magamit pag-usab, bisan wala pa makompleto ang pagbawi sa duha ka bahin niini sa maong misyon.
Gituyo sa SpaceX nga mahimong nag-unang sakyanan ang Starship alang sa umaabot nga mga operasyon sa Starlink, pagbutang og mga data center sa orbit, ug mga misyon ngadto sa Bulan ug Mars, lakip ang pagdala sa mga astronaut ngadto sa Bulan ubos sa programa sa Artemis sa NASA. (raniel mahunyag)
