PNP, gipasiugda ang dili pagbabag sa sibilyan sa lehitimong operasyon sa kapulisan

Gipasiugda pag-usab ni Philippine National Police (PNP) Public Information Office chief Police Brigadier General Allen Rae Co nga dili angay nga babagan sa mga sibilyan ang lehitimong pagpatuman sa balaod sa kapulisan, human gikuwestiyon sa kanhi pulis ug kanhi magbabalaod ang usa ka checkpoint nga gipahigayon sa mga kapulisan.

Matud ni Co, dili angay pugngan sa mga sibilyan ang mga checkpoint ug operasyon sa kapulisan nga gihimo subay sa balaod pinaagi lamang sa personal nga paghukom, tungod kay makababag kini sa ilang katungdanan sa pagpugong sa krimen ug pagmintinar sa kalinaw ug kahapsay.

Dugang pa niya, giila sa PNP nga mahimong mahitabo ang mga kalapasan atol sa operasyon sa kapulisan, busa giawhag ang publiko nga idangop sa hustong mga opisina ang ilang mga reklamo aron kini matubag ug maimbestigahan.

Gipasalig usab ni Co nga ang PNP, ubos sa pagpangulo ni PNP Chief Police General Jose Melencio Nartatez Jr. kay nagpadayon sa pagpatuman sa pagdisiplina batok sa mga pulis nga makalapas sa mga lagda pinaagi sa pagpahamtang og tukmang silot, lakip ang pagsuspenso ug pagkatangtang sa serbisyo. (raniel mahunyag)