Alang lamang sa kaayohan sa mga langyawng kompanya ug dili sa lokal nga ekonomiya ang mga trabaho nga ipatukod ubos sa Pax Silica sukwahi sa gipasalig ni Presidente Ferdinand Marcos Junior.
Gipunting ni IBON Foundation Executive Director Sonny Africa nga dili gyud palambuon sa Estados Unidos ang industriya sa semiconductor sa Pilipinas tungod kay dili gusto sa mga langyawng negosyante nga makabaton og kakompetensya sa merkado ug hilaw nga materyales.
Dugang pa ni Africa, nabulgar usab sa briefing sa Kongreso nga grabeng pagpanghasi sa mga unyon ug pag ipit sa benepisyo ang nasinati sa mga trabahante sa kasamtangang mga pabrika sa semiconductor sa nasud.
Imbes nga magsalig sa mga langyawng korporasyon nga nagpahimulos sa barato nga kusog sa pamuo, nagtuo si Africa nga angayan nga magtukod og kaugalingong pabrika ang gobyerno alang sa tinuod nga kauswagan sa mga mamumuong Pilipino.










