ipanghimakak ni Police Major General Anthony Aberin ang mga pasangil nga adunay gipakitang espesyal nga pagtratar sa kapolisan ngadto sa mga nagpahigayon og rally sa EDSA.
Matud sa hepe sa National Capital Region Police Office, patas ug subay sa balaod ang ilang pagpatuman sa seguridad atol sa maong demonstrasyon.
Gipasabot niya nga gihangyo sa kapolisan ang mga organizer nga dili harangan ang mga dalan aron mamenosan ang epekto sa trapiko, samtang gipadayon usab ang polisiya sa maximum tolerance aron malikayan ang komprontasyon.
Gipahinumdoman usab ni Aberin nga sa mga miaging demonstrasyon, adunay mga higayon nga midakop ug migukod ang kapolisan sa mga raliyistang milapas sa balaod pinaagi sa pagharang sa dagan sa trapiko.
Dugang pa niya, bisan pa sa kakuwang sa gidaghanon sa mga polis kon itandi sa kadaghanon sa mga raliyista, wala sila magkulang sa pagtuman sa ilang katungdanan aron mapadayon ang kahapsay ug kalinaw sa lugar.
gipasalig ni Aberin nga patas ang pagpatuman sa kapolisan sa balaod sa tanang grupo nga nagpahigayon og mga demonstrasyon, samtang girespeto usab ang katungod sa publiko sa malinawon nga pagpundok ug pagpahayag sa ilang mga baruganan
