Gipahayag ni ACT Teachers Party-list Representative Antonio Tinio ang iyang pagduda kung igo ba ang usa ka tuig nga gitakda sa administrasyon aron mapanubag ang mga gitawag niyang “dagkong isda” sa mga alegasyon sa korapsyon.
Kini human mopasalig ang administrasyon nga pasakaan og kaso ang mga dagkong personalidad nga posibleng nalambigit sa maong isyu, lakip ang kanhing Speaker Martin Romualdez.
Apan, matod ni Tinio, dili angay nga mahunong o malubong ang imbestigasyon sa mga proyekto sa flood control bisan pa og adunay mapasakaan na sa kaso.
Giingon niya nga ang giingong korapsyon dili lamang limitado sa Kongreso, kondili naglakip usab sa executive branch nga maoy nagpatuman sa mga proyekto ug sa legislative branch nga nag-aprobar sa pondo niini.
Matod pa niya, nagpakita kini og usa ka lalom nga sabwatan tali sa duha ka sangay sa gobyerno sa pagdumala ug paggamit sa pondo sa Department of Public Works and Highways o DPWH.
