Nanawagan si ACT Teachers Party-list Representative Antonio Tinio nga tulubagon ang tanang nalambigit sa mga kaso sa pagpanlupig sulod sa mga eskwelahan, bisan pa kon mga menor de edad ang mga suspek, subay sa kasamtangang Juvenile Justice Law.
Matud niya, kinahanglan nga mahatagan og hustisya ang mga biktima, samtang ang mga kakulangan sa sistema sa eskwelahan kinahanglan usab nga masusi pag-ayo.
Gipasiugda usab ni Tinio ang kamahinungdanon sa pagpalig-on sa mental health services aron malikayan ang susamang mga insidente sa umaabot.
Giklaro niya nga adunay pondo ang gobyerno alang sa pag-hire og dugang nga mga guidance counselor nga motutok sa mental ug emosyonal nga kahimtang sa mga estudyante.
Naglaum ang kongresista nga pinaagi niini, masiguro ang mas luwas ug mas angay nga palibot sa pagkat-on alang sa tanang kabataan. (jane abulag)
