Gipanghimakak ni House Prosecutor spokesperson Zia Alonte Adiong ang pasangil nga tuyo sa ilang kampo ang paghimo og kasamok, isip tubag sa pahayag ni Vice President Sara Duterte nga, “In this bloodbath and bludgeoning, I will be bloodied but unbowed.”
Gipatin-aw ni Adiong nga walay bisan unsang intensyon ang prosekusyon nga manakit, kondili ang ilang tumong mao ang pagpangayo og tubag may kalabotan sa mga Articles of Impeachment batok sa Bise Presidente.
Matod pa niya, wala siya makasabot nganong kanunay gamiton ni Duterte ang pulong nga “dugo” sa iyang mga pahayag.
Gipagawas ni Adiong ang maong tubag atol sa usa ka press conference sa House of Representatives karong adlawa.
Gipasiugda usab niya nga ang tinuod nga tumong sa prosekusyon mao ang pagtubag sa mga isyu sa balaod ug dili ang personal nga pag-atake. (JANE ABULAG)
