GIPASABOT ni Ombudsman Jesus Crispin “Boying” Remulla nga gisusi pag-ayo sa Office of the Ombudsman ang mga affidavit sa pipila ka kanhing bodyguards ni kanhing Ako Bicol Party-list Representative Zaldy Co nga gigamit isip kabahin sa mga reklamong gisang-at batok kang kanhing House Speaker Martin Romualdez.
Matod niya, walo lamang sa 18 ka kanhing bodyguards ang gigamit isip mga testigo tungod kay sila ang adunay direktang personal nga kahibalo sa mga alegasyon, ug dili posible nga parehas ang nakita ug nasinati sa tanang 18 ka indibidwal sulod sa kapin duha ka tuig.
Gibutyag usab ni Assistant Ombudsman Mico Clavano nga adunay dugang ug independenteng ebidensiya nga nakolekta aron mosuporta sa mga salaysay sa mga testigo, samtang gihulat sa Ombudsman ang counter-affidavit ni Romualdez sulod sa gitakdang panahon.
