Gipasalig sa Armed Forces of the Philippines (AFP) nga andam ang ilang mga tropa sa paghatag og tabang sa mga mangingisda sa West Philippine Sea panahon sa mga kalamidad.
Matud ni AFP Spokesperson for the West Philippine Sea, Rear Admiral Roy Vincent Trinidad, nga nagpadayon ang koordinasyon sa Office of Civil Defense (OCD), Department of National Defense (DND), ug AFP aron masiguro ang paspas nga pagresponde ilabina panahon sa typhoon season.
Bisan pa og dili kasagarang maagian og bagyo ang mga maritime features sa West Philippine Sea, aduna na silay nakalatag nga contingency plans alang sa search and rescue operations ug uban pang suporta.
Kabahin usab sa ilang pagpangandam ang hugot nga koordinasyon sa ubang mga ahensya sa gobyerno aron dali nga mahatagan og tabang ang mga mangingisda ug uban pang apektadong mga Pilipino.
Sumala sa AFP, nagpakita kini sa ilang padayon nga paningkamot sa pagpanalipod sa kaluwasan sa atong mga mangingisda bisan pa sa mga hagit nga dala sa dili maayong panahon.
